रोजगारासाठी युवक पिढी तळमळत असून,याला केवळ भरणे जबाबदार…
इंदापूर : महाराष्ट्र टुडे लाईव्ह न्यूज नेटवर्क…
विकास काम कसे करावे हे मला माहित आहे अशी स्वतःची टिमकी वाजवणाऱ्या आ. भरणे यांनी गेल्या ८ वर्षात किती युवकांना नोकऱ्या दिल्या? शेतकऱ्यांसाठी नद्यांवरती किती बंधारे व वीज उपकेंद्रे तसेच प्रक्रिया उद्योग काढले ? किती विद्यालये काढली? किती सहकारी संस्था निर्माण केल्या? तालुक्यात सिंचनाखाली किती नवीन क्षेत्र आणले? जनतेच्या आरोग्यासाठी इंदापूर व इतर ठिकाणी नवीन काय सुविधा उपलब्ध केल्या ? हे नेहमीप्रमाणे देवाची शपथ घेऊन आ.भरणे यांनी जाहीर करावे,असे आव्हान इंदापूर तालुका भाजपचे अध्यक्ष अँड शरद जामदार यांनी दिले आहे.
इंदापूर तालुक्यात रविवारी झालेल्या कार्यक्रमात आ. भरणे यांनी विकास कामे करण्यास मी खंबीर असल्याने विरोधकांनी शांत बसावे अशी टीका केली. त्यास भाजपचे तालुकाध्यक्ष अँड शरद जामदार यांनी प्रत्युत्तर दिले.इंदापूर तालुक्यातील युवकांची चालु पिढी नवीन रोजगाराच्या निर्मिती अभावी नोकरीसाठी तळमळत आहे,युवकांच्या या परिस्थितीस आ.भरणे यांचा नाकर्तेपणा कारणीभूत असल्याचा आरोप अँड.जामदार यांनी केला. त्यांचा तळतळात आमदारांना घ्यावा लागेल. तालुक्याच्या सर्वांगीण विकास कामांची दूरदृष्टी आमदारांकडे नाही.
खोटे बोल पण रेटून बोल,दिसेल त्या देवाची शपथ घेणे, जनतेची दिशाभूल करणे आदी त्यांची नाटके जनतेने ओळखली आहेत, जनतेला फार काळ फसवता येत नाही हे त्यांनी लक्षात ठेवावे असा टोलाही अँड जामदार यांनी लागावला.राज्यात मुख्यमंत्री एकनाथ शिंदे, उपमुख्यमंत्री देवेंद्र फडणवीस यांच्या नेतृत्वाखालील शिवसेना-भाजपचे सरकार सत्तेवर आल्याने भाजपच्या माध्यमातून इंदापूर तालुक्यामध्ये विकास कामांसाठी मोठा निधी येऊ लागल्याने आ.भरणे यांच्या पायाखालची वाळू सरकली आहे, त्यामुळे ते बेताल वक्तव्य करीत आहेत.
राज्यात आता महाविकास आघाडी सरकारची सत्ता नसून शिवसेना-भाजपची सत्ता आहे, हे विरोधी पक्षाचे आ.भरणे यांनी मान्य करावे. त्यामुळे तालुक्यातील विकास कामांचे खोटे श्रेय घेण्याची सवय त्यांनी आता बंद करावी, असा सल्लाही भाजपचे तालुकाध्यक्ष अँड. शरद जामदार यांनी दिला आहे.
