पुणे : महाराष्ट्र टुडे लाईव्ह न्यूज नेटवर्क…
जिल्हा सैनिक कल्याण कार्यालयामार्फत माजी सैनिक महिला बचत गट उपक्रमाअंतर्गत पीएमपीएल प्रवासी वाहतूक बसेससाठी कल्याणकारी निधीतून शासनातर्फे मंजूर असलेल्या १० लाख रूपये अनुदानापैकी ३ लाख रूपयांचा धनादेश जिल्हाधिकारी डॉ. राजेश देशमुख यांच्या हस्ते गोपेश्वर महिला बचत गट हडपसर व जय जवान महिला बचत गट हडपसर यांना प्रदान करण्यात आले.
माजी सैनिकांच्या पत्नी तसेच विधवा महिला यांनी मिळून बचतगट तयार केले असून त्याची नोंदणी जिल्हा सैनिक कल्याण कार्यालयाकडे केली आहे. महिलांना व्यवसाय तसेच रोजगाराला चालना देण्यासाठी अनुदान देण्याची योजना आहे. या अनुदान योजनेअंतर्गत हडपसर येथील या दोन्ही महिला बचत गटांनी बस खरेदी केली आहे. ही बस पीएमपीलला भाडेतत्वावर देण्यात आली आहे.
यासाठी या महिलांनी काही प्रमाणात बचतगटाचे तर काही बँकेकडून भांडवल घेतले आहे. जिल्हा सैनिक कल्याण कार्यालयाने या बचतगटांना १० लाख रूपये अनुदान मंजूर केले असून चार हप्त्यात हे अनुदान देण्यात येणार आहे. त्यातील पहिल्या हप्त्याचे आज वितरण करण्यात आले.यावेळी उपजिल्हाधिकारी तथा जिल्हा सैनिक कल्याण अधिकारी अजय पवार, कल्याण संघटक दिपक शेळके, अविनाश ढोले, पांडुरंग नवले, रामचंद्र गायकवाड, पंडित जगदाळे तसेच दोन्ही महिला बचत गटाचे पदाधिकारी व उपस्थित होते.