महाराष्ट्र टुडे लाईव्ह न्यूज नेटवर्क..
पन्नास कोटींच्या पैश्यांचा पाऊस पाडून देतो असं आमिष दाखवून एका टोळीने ठाकुर्लीतील एका बांधकाम व्यावसायिकाला तब्बल ५६ लाखांना गंडा घातल्याचा धक्कादायक प्रकार उघडकीस आला आहे.पैशांचं पाऊस पाडण्याचं प्रकरण समोर आल्यानं मात्र एकच खळबळ माजली आहे.याप्रकरणी सुरेंद्र पाटील यांनी मानपाड्या पोलीस ठाण्यात फिर्याद दिली आहे.याबाबत संशयित आरोपी गणेश,शर्मा गुरुजी,अशोक गायकवाड, महेश व मोकळे या आरोपींवर गुन्हा दाखल केला असून, याप्रकरणी चौघांना मानपाडा पोलिसांनी ताब्यात घेतल आहे.
याबाबत मानपाडा पोलीस ठाण्याचे पोलीस अधिकारी शेखर बागडे यांनी दिलेल्या माहितीनुसार,व्यावसायिक सुरेंद्र पाटील ठाकुर्ली चोळेगाव येथील रहिवासी असून दावडी गावात पाटीदार भवन येथे त्यांचे कार्यालय आहे.पाटील यांना पाच भोंदूबाबाच्या टोळीने दहाटक्के पैसे पूजेसाठी दिले होते.त्यानंतर ५० कोटींचा पाऊस पाडून देतो असं आमिष त्यांनी दाखवलं होतं. त्यानुसार ५६ लाखांची रक्कम सुरेंद्र यांनी तयार ठेवली. शनिवारी रात्री या भोंदूबाबाच्या टोळीने त्याच्या पाटीदार भवन कार्यालयात पैशांचा पाऊस पाडण्यासाठी पुजा सुरू केली.
पहाटेच्या सुमारास या टोळीने सुरेंद्रला त्याच्या इमारतीला पाच प्रदक्षिणा मारण्यास सांगितले. सुरेंद्रने प्रदक्षिणा घालण्यास सुरुवात केली.त्यावेळी या टोळीने संधीचा फायदा घेत त्यांना दिलेले ५६ लाख रुपये घेवून पोबारा केला.आपली फसवणूक झाल्याचे लक्षात येताच पाटील यांनी मानपाडा पोलिस ठाणे गाठले.आणि पाचही जणांविरोधात तक्रार दाखल केली.त्यानंतर चार संशयित आरोपींना मानपाडा पोलिसांनी ताब्यात घेतलं. या प्रकरणाचा पुढील तपास सुरु आहे
