माळेगाव : महाराष्ट्र टुडे लाईव्ह न्यूज नेटवर्क…
आंदर मावळ येथील माळेगाव गावाच्या हद्दीतील एका विवाहित महिलेला अज्ञात आरोपींनी निर्वस्त्र करून डोक्यात धारदार शस्त्राने वार करून हत्या केल्याची धक्कादायक घटना रविवारी (दि. १३) दुपारी तीन वाजण्याच्या सुमारास तळपेवाडी माळेगाव बुद्रुक ता. मावळ येथे घडली आहे. फसाबाई साळू निसाळ ( वय ३६, रा. ताळपेवाडी माळेगाव बुद्रुक., तालुका मावळ) असे हत्या झालेल्या महिलेचे नाव आहे.
पोलिसांनी दिलेल्या माहितीनुसार,मयत फसाबाई निसाळ व त्यांचे पती साळू निसाळ धरणाच्या शेतात फरसबी लावण्याचे काम करत असताना फसाबाई दुपारी पाडाळीवरच्या जनावरांना पाणी पाजण्यासाठी गेल्या व साळू निसाळ शेतात काम करत होते. सायंकाळी साळू निसाळ पडाळीवर गेले असता, त्यांनी पत्नीला रक्ताच्या थारोळ्यात निर्वस्त्र पडल्याचे पाहिले.त्याबाबत त्यांनी वडगाव पोलीस ठाण्यात या घटनेची माहिती देताच पोलीस हवालदार शैल कंटोळी व होमगार्ड सुरेश शिंदे यांनी घटनास्थळी धाव घेतली. तसेच मृतदेहाचा पंचनामा करून मृतदेह ताब्यात घेतला.गुन्ह्याचे कारण अद्याप स्पष्ट झाले नसले तरी,या गुन्ह्याचा छडा लावून गुन्ह्यातील आरोपींना अटक करण्याचे मोठे आव्हान पोलिसांपुढे आहे.हा गंभीर स्वरूपाचा गुन्हा असून त्या दृष्टीने वडगाव पोलीस तपास करत आहेत.
